რა სარგებლობა მოაქვს BF-ს?

ანუ, ვინაიდან სთრეითი ვარ, BF-ს, თორემ ისე უფრო უპრიანი იქნებოდა, მეთქვა პარტნიორს?


ჰმმ... ნუ, ერთ–ერთი მთავარი ფუნქცია ამ სტანდარტული ფუნქციების მერე ჩემთვის იქნება ნათურის გამოცვლა... დიახ და კიდევ ლურსმნის ჭედება... და ეგეთები. საერთოდ არ მეხერხება მსგავსი საქმეები, ამიტომაც იყო ჩემი ფოტოების კოლაჟი 1,5 წელი იატაკზე გაშლილი... მერე მოვიფიქრე ერთ მშვენიერ დღეს და ჭიკარტებით დავამაგრე კედელზე .


ჰოდა, ნუ... არასოდეს ვიფიქრებდი, რომ უპარტნიორობა უთანასწორო მდგომარეობაში ჩამაგდებდა და აჰა, მოვიდა დღე იგი საოცარი...
ბანკში ვიყავი, ჩემი დიადი ფინანსური სიდუხჭირის შესამსუბუქებლად კრედიტის აღება მინდოდა და ჰმმმ... ისაო, რიავიციო, ხელფასი იმდენი არ გაქვს, რამდენიც საჭიროაო.. აი, 200 ევროთი მეტი რომ გქონდესო... მეთქი არ მაქვს, მაგრამ იქნებ, სხვა საშუალება მოვიფიქროთ რამეთქო და უცებ მესმის ზეფრაზა: აიო, თქვენი პარტნიორი მოიყვანეთ მაშინო და იმისი ხელფასი თუ მინიმუმ 200 ევროა, გაგიზრდით კრედიტს, სხვა შემთხვევაში ხელები მაქვს შეკრულიო (Ihm waren die Hände gebunden :D).

ჩემი რეაქცია იყო ასეთი: Fuck, აქაც არ მასვენებენ... მაგრამ არ შევიმჩნიე და:
-Er würde ja so gerne kommen, wenn er existieren würde-თქო.
(რომ არსებობდეს, დიდი სიამოვნებით მოვიდოდათქო, ანუ).


ესე იგი, რატომ უნდა ვისჯებოდე მე და რატომ უნდა იყოს ჩემი მარტო ცხოვრება–არცხოვრება კრედიტის გაცემისას გადამწყვეტი? აღშფოთებული ვარ პირდაპირ


თან ისე სრულიად დარწმუნებულმა მითხრა, მეც კი დავფიქრდი წამით, მართლა ხომ არ მყავსთქო? ეგ ფაქტი არც დაუშვა ტიპმა....

გავაპროტესტე გულში საშინლად, მაგრამ რა მექნა, იქ ხომ არ დავიწყებდი, თქვენ მე მჩაგრავთ და უმცირესობაში მიმიჩინეთ ადგილი და ჩემს უფლებებს არღვევთ, რადგან თანასწორად არ მემსახურებით, ვიღაც რომ მოვიდეს თავის ნაშასთან, იმას მისცემთ კრედიტს და მე არ მაძლევთ,მარტო იმიტომ, რომ მე ნაშა არ მყავსთქო???
ფრიად გაოგნებულ მზერას მივიპყრობდი.


ჰოდა, ვიღაცა ამბობდა ხოლმე, კუდამოძუებული წამოვბუნძულდიო, რაღა მოგატყუოთ და ფრაზა დღეს ჩემზე იყო ზედგამოჭრილი.